سبب اكتسابك للوزن بصورة كبيرة بعد الدايت
التكيف الأيضي، آلية دفاعية يلجأ لها جسمك
زيادة الوزن بعد الدايت يصير مع أغلب البنات حتى اللي التزامهم كان عالي، وما قصّروا، وما أكلوا خارج الخطة.
تمشي الأسابيع، وتشوفي الرقم على الميزان ينزل، وتحسي إنك وصلتِ لهدفك. ثم تخلصي الدايت، وترجعي لأكلك الطبيعي. مو بإفراط، بس بطريقة أقل تقييداً وفجأة الوزن يبدأ يرجع. أحياناً بنفس سرعة ما نزل، أو أسرع
وهنا تجي الفكرة اللي تقوليها لنفسك: “واضح جسمي عنيد… أكيد الحرق عندي بطيء”. وهذي الفكرة، رغم إنها مفهومة، إلا إنها مو الحقيقة الكاملة.
جسمك ماهو عنيد، هو تأقلم
اللي صار ما هو عناد من جسمك ولا خلل فيك. جسمك دخل في حالة علمية اسمها
التكيف الأيضي – (Metabolic Adaptation)
وهي آلية دفاعية طبيعية، موجودة في كل إنسان، يلجأ إليها الجسم تلقائياً لما يحس بنقص في الطاقة الداخلة. الجسم ما يفهم مفهوم “الدايت” ما يعرف إنك تحاولي تخسري وزن بشكل اختياري. اللي يفهمه هو إن الطاقة اللي تدخل قلّت، فيبدأ يتصرف على أساس إن في خطر.
خلال هذي العملية، يصبح الجسم أكثر كفاءة في استخدام السعرات الحرارية. وكلمة “كفاءة” هنا تبدو إيجابية، لكن في سياق الدايت تعني شيئ واحد: إنه يحرق أقل. يبطّئ معدل الأيض الأساسي أو عمليات الحرق بالمعنى الآخر
اللي يصير داخل جسمك أثناء الدايت؟
اثناء الدايت، جسمك يشوف السعرات القليلة (نتكلم عن اقل من 1500 سعرة لفترة طويلة من الزمن) كحالة نقص طاقة مو كقرار صحي واعي. وأولويته الأولى والأخيرة مو إنك تخسري دهون، أولويته إنه يحافظ على صحتك. فيبدأ يتكيف مع الظروف اللي انوضع فيها
هذا التكيف ما يصير فجأة ولا بقرار واضح، يصير بشكل تدريجي وبدون ما تحسي فيه. معدل الحرق ينخفض، وحركتك اللاإرادية تقل بدون ماتلاحظي ” الأشياء الصغيرة اللي تسويها بدون تفكير زي التقلب في كرسيك أو المشي” . الجسم يحاول يوفر كل قطرة طاقة ممكنة. وبمرور الوقت، يصبح فعلاً أكثر كفاءة و يشغّل نفسه بسعرات أقل مما كان يحتاج قبل الدايت
ليش الوزن يرجع بسرعة بعد ما تخلصي الدايت؟
المشكلة الحقيقية ما تبدأ أثناء الدايت انما تبدأ بعده. لما تخلصي الدايت وترجعي للأكل بشكل مفاجئ، جسمك ما يعرف إن الوضع صار آمن. هو لسه مبرمج على وضعية عجز السعرات، ولسه شغّال بمعدل حرق أبطأ من الطبيعي. فكل سعرة إضافية تدخل يتعامل معها بحذر ويميل لتخزينها، مو لأنك أكلتِ كثير، بل لأن الجسم ما أخذ وقته الكافي يرجع يشتغل بوضعه الطبيعي
وعند النساء، الموضوع يكون أوضح وأعمق. الجسم الأنثوي حساس بطبيعته للتغيرات الحادة في السعرات، والتغيرات الهرمونية اللي تصاحب الدايت وما بعده تلعب دور كبير في سرعة رجوع الوزن. عشان كذا الرجوع المفاجئ للأكل بعد الدايت غالباً يؤدي لزيادة وزن أسرع من المتوقع حتى لو الأكل نفسه ما كان سيئ او صحي ، وحتى لو كانت السعرات اللي رجعتِ إليها معقولة بكل المقاييس
دوامة اليويو دايت ، الخطأ اللي تقع فيه كثير بنات
هنا يبدأ الجزء اللي يتكرر مع أغلب البنات اللي مروا بتجارب دايت متعددة. أول ما تشوف الوزن يرجع، الحل اللي يبدو منطقي هو إنك ترجعي تقللين الأكل مرة ثانية، أو تدخلي دايت جديد. والنتيجة؟ نفس الدورة من البداية: نزول وزن، ثم ثبات، ثم زيادة، ثم دايت جديد وهكذا بلا نهاية. ومع كل دايت تصير أصعب من اللي قبلها، لأن الجسم مع كل مرة يتكيف أكثر ويصبح أكثر مقاومة
المشكلة إن ما فيه مرحلة انتقالية واضحة بين الدايت والعودة للأكل الطبيعي. الجسم يضيع بين التقييد المفاجئ والعودة المفاجئة، ولا يعطَى وقت كافٍ يعيد ضبط نفسه. وهذا بالضبط هو اللي يخلي زيادة الوزن شبه حتمية مو لأن فيك خلل ولا لأنك ما التزمتِ، بل لأن الجسم ببساطة ما أُعطيَ الفرصة يتعود على النظام الجديد
كيف نطلع من الدايت بدون ما نخرب اللي تعبنا عليه؟
هذا هو السؤال الأهم والجواب ما هو في دايت جديد أشد، ولا في عجز سعرات اعلى. الجواب يبدأ بفهم إن الخروج من الدايت يحتاج استراتيجية بنفس قدر أهمية الدخول فيه. ويبدأ مع مفهوم علمي اسمه الدايت العكسي وهو الطريقة اللي تساعد جسمك يرجع لمعدل حرقه الطبيعي بشكل تدريجي
وهو الموضوع الكامل للمقالة القادمة
إالحلقة القادمة: الدايت العكسي — كيف ترجعي للأكل بدون ما يرجع وزنك
استجابات